नंदूरबार l प्रतिनिधी
देव मोगरा पुनर्वसन येथील मशरूम युनिटला सामाजिक कार्यकर्त्या व महिला काँग्रेसच्या जिल्हाध्यक्ष हिरा विलास पाडवी यांनी भेट देऊन मशरुम शेतीची पाहणी करुन महिलांना प्रोत्साहन दिले.दरम्यान सातपुड्यातील मशरूम व रसायनमुक्त काळ्या तांदळाला अमेरिकेत मागणी आहे.
या भेटीत मशरूम शेतीच्या महिला मार्गदर्शक लीला वसावे व कीर्ताबाई वसावे यांनी हिरा पाडवी यांना मशरूम शेतीची माहिती दिली.तसेच सातपुड्यातील महिलांना घरच्या घरी आपले दैनंदिन काम सांभाळून करता येण्यासारखा एक चांगला व जास्तीत जास्त रोजगार तसेच फायदेशीर उत्पन्न मिळवून देणारा व्यवसाय असल्याचे सांगितले.
त्यामुळे हिरा पाडवी यांनी शासकीय अधिकारी ,सामाजिक कार्यकर्ते तसेच राजकीय नेत्यांनी अशा ठिकाणी भेट देवुन व्यावसायिक व व्यवसायला प्रोत्साहन देणे गरजेचे आहे असे मत व्यक्त केले सोबत येथील मशरूम व काळा तांदुळ आपण अमेरिकेत स्थायिक असलेल्या आपल्या मुलीला पाठवणार असल्याचे सांगितले.
यावेळी मशरूम शेतीचे मार्गदर्शक राजेंद्र वसावे यांनी सातपुड्यात वाढत असलेल्या मशरूम व्यवसायाची माहीती दिली.तसेच फाऊंडेशनच्या माध्यमातून युवकांना स्व विकासासाठी सहाय्यता उपलब्ध करणार असल्याचे सांगितले.याप्रसंगी पुनर्वसन येथील बहुसंख्य महिला उपस्थित होत्या.त्यामुळे महिला घेत असलेल्या पुढाकाराचे हिरा पाडवी यांनी कौतुक केले.