नंदूरबार l प्रतिनिधी
नंदुरबार नगरपालिकेच्या वतीने घरपट्टी वसुलीसाठी थकबाकीदारांची नावे फलकात जाहीर करून आपमानित करण्याच्या पद्धतीला भारतीय जनता पार्टीचा विरोध असून आज शहरातील जुन्या पालिका चौकात भाजप कार्यकर्त्यांच्या वतीने जिल्हाध्यक्ष विजय चौधरी यांच्या उपस्थितीत निदर्शने करण्यात आली.
गेल्या दोन वर्षात कोरोना काळात लाॅकडाऊन मुळे व्यावसायिक व सामान्य नागरिकांची आर्थिक परिस्थिती पूर्णता खालावल्याने विविध कर व घरपट्टी भरली गेलेली नाही. या आधीच भारतीय जनता पार्टीच्या वतीने घरपट्टी माफ करावी अशी मागणी केली होती, परंतु नंदुरबार नगरपालिकेने घरपट्टी थकबाकीदारांची नावे फलकात जाहीर करून वसुलीचा तगादा लावला आहे. कर व घरपट्टी वसुलीसाठी नगरपालिकेच्या वतीने नावे जाहीर करून नागरिकांना अपमानीत करत असल्याने भारतीय जनता पार्टीच्या वतीने निदर्शने करण्यात आली. जनतेला छळून अपमानित केल्याचे भारतीय जनता पार्टी खपवून घेणार नाही. याबाबत जनतेमध्ये जनजागृती करणार असून माजी आमदार चंद्रकांत रघुवंशी व नगराध्यक्ष रत्ना रघुवंशी यांनी त्यांच्या जवळच्या थकबाकीदारांची नावे फलकात जाहीर केलेली नाही. मात्र सामान्य नागरिकांचे नाव फलकात जाहीर केल्याचा भारतीय जनता पार्टीच्या वतीने धिक्कार करत असल्याची प्रतिक्रिया जिल्हाध्यक्ष विजय चौधरी यांनी दिली.
यावेळी माजी आ.शिरिष चौधरी म्हणाले, कोरोना काळात व्यवसाय ठप्प होते.उदरनिर्वाह चालविणे कठीण होते.असे असतांना आता पालिकेने घरपट्टी वसुलीसाठी नगरपालिकेच्यावतीने नावे जाहीर करून नागरिकांना अपमानित करण्याचा प्रयत्न केल्याने याचा निषेध करत असल्याचे शिरीष चौधरी यांनी सांगितले. पुढे ते म्हणाले की.नंदूरबार नगर पालिकेचा अजब कारभार सुरू असून बगलबच्याना सूट तर सामान्य नागरिकांनी लूट करण्यात येत असल्याचे त्यांनी सांगितले.
यावेळी माजी.आमदार शिरीष चौधरी, विरोधी पक्षनेता चारुदत्त कळवणकर, नगरसेवक प्रशांत चौधरी, गौरव चौधरी, आनंदा बाबुराव माळी, निलेश माळी, नरेंद्र माळी, माणिक माळी, कुशाल चौधरी राहुल चौधरी यासह भाजपा पदाधिकारी उपस्थित होते.
