नंदुरबार l प्रतिनिधी
राज्यातील मंदिरांसह सर्व धर्मियांचे प्रार्थनास्थळे घटस्थापनेच्या मुहूर्तावर म्हणजेच सात ऑक्टोबरपासून उघडली जाणार आहेत . कोरोना संसर्गाच्या पार्श्वभूमीवर राज्यातील सर्व मंदिरे बंद करण्यात आलेली आहेत .
लॉकडाऊन हटवला असून संसर्गाची परिस्थितीही हातात असल्यामुळे आता मंदिरे उघडण्याचा निर्णय घेण्यात आला आहे . अनेक महिन्यांपासून मंदिरे बंद आहेत. घटस्थापनेच्या मुहूर्तावर राज्यातील मंदिरे उघडली जाणार आहेत . नवरात्रीच्या पहिल्या दिवशीपासून म्हणजे ७ ऑक्टोबरपासून राज्यातील सर्वधर्मियांची प्रार्थना स्थळे आरोग्याचे नियम पाळून भक्तांसाठी खुली करण्याचा निर्णय मुख्यमंत्री उद्धव ठाकरे यांनी घेतला आहे .
यासंदर्भात मुख्यमंत्री म्हणतात की , दुसऱ्या लाटेचा मुकाबला केल्यानंतर आता संभाव्य तिसऱ्या लाटेशी लढण्याचे आपण नियोजन केले आहे केले आहे . मात्र हळूहळू सर्व प्रकारची काळजी घेत बऱ्याच बाबतीत निर्बंध शिथिल करीत आलो आहोत . सध्या कोरोनाच्या रुग्ण संख्येमध्ये उतार येत असला तरी आपल्याला अधिक सावध राहावे लागेल . धार्मिक स्थळे भक्तांसाठी खुली केली असली तरी त्याठिकाणी आरोग्याच्या नियमांचे पालन झालेच पाहिजे . चेहऱ्यावर मास्क , सुरक्षित अंतर , जंतुनाशकाचा वापर हा झालाच पाहिजे . धार्मिक स्थळांच्या व्यवस्थापन समितीची यामध्ये मोठी जबाबदारी आहे हे विसरू नये असे त्यांनी सांगितले.
