शहादा l प्रतिनिधी
येथील तालुका सहकारी खरेदी विक्री संघाच्या चेअरमनपदी प्रा. मकरंद पाटील पाटील व व्हाईस चेअरमनपदी अरविंद पाटील यांची बिनविरोध निवड करण्यात आली.
येथील सहकारी खरेदी विक्री संघाच्या सभागृहात निवडणूक प्रक्रिया झाली. निवडणूकीपूर्वी सातपुडा साखर कारखान्याचे अध्यक्ष तथा लोकशाही आघाडीचे नेते दीपकभाई पाटील यांच्या प्रमुख उपस्थितीत सर्व नवनिर्वाचित संचालकांची बैठक घेण्यात आली. बैठकीत निवडीचे सर्वाधिकार श्री. पाटील यांना देण्यात आले.
सर्व संचालकांची मते जाणून घेत दीपकभाई पाटील यांनी चेअरमनपदासाठी प्रा. मकरंद नगिन पाटील यांची तर व्हाइस चेअरमनपदासाठी अरविंद सुदाम पाटील यांची नावे जाहीर केली. त्यानुसार सकाळी अकरा वाजता चेअरमनपदासाठी प्रा.मकरंद पाटील व व्हाइस चेअरमनपदासाठी अरविंद पाटील यांनी अर्ज दाखल केले. दोन्ही पदांसाठी एकेकच अर्ज आल्याने नियमानुसार निवडणूक निर्णय अधिकारी भारती ठाकूर यांनी निवड बिनविरोध झाल्याचे घोषित केले. खरेदी विक्री संघाचे मॅनेजर अनिल पाटील यांनी निवडणूक कामी सहकार्य केले.
प्रा.मकरंद पाटील यांची चेअरमन आणि अरविंद पाटील यांची व्हाइस चेअरमपदी निवड झाल्याबरोबर लोकशाही आघाडीच्या कार्यकर्त्यांनी खरेदी विक्री संघाच्या आवारात फटाक्यांची आतिषबाजी करून जल्लोष केला. नूतन चेअरमन व व्हाइस चेअरमन यांचे अभिनंदन करण्यासाठी कार्यकर्त्यांनी मोठ्या प्रमाणात गर्दी केली होती.
यावेळी माजी चेअरमन विजय विठ्ठल पाटील व राजाराम पाटील, माजी नगराध्यक्ष विजय दामू पाटील, माजी नगरसेवक के.डी.पाटील, कृषी उत्पन्न बाजार समितीचे सभापती सुनील पाटील, विद्यमान संचालक मयूर दीपक पाटील यांच्यासह असंख्य कार्यकर्ते उपस्थित होते. नवनिर्वाचित पदाधिकाऱ्यांनी सर्व नेते आणि कार्यकर्त्यांचे आभार मानले.
