नंदुरबार l प्रतिनिधी
सध्या सर्वत्र लग्नसराईची धामधूम सुरू आहे. या धामधुमीत धमडाई ग्रामपंचायतीचे शिवसेनेच्या (शिंदे गट) सरपंचाच्या पुढाकारातून वधू-वरांच्या हस्ते वृक्षारोपण करण्यात येऊन पंचांच्या साक्षीने त्यांच्या वयाची चौकशी करून जागेवरच विवाह नोंदणी प्रमाणपत्र देण्याच्या उपक्रम गावात राबविण्यात येत आहे.
नंदुरबार जिल्हा पोलीस दलाच्या माध्यमातून बालविवाह रोखण्यासाठी मोठ्या प्रमाणावर जनजागृती करण्यात येत आहे. त्याच्याच एक भाग म्हणून धमडाई ग्रामपंचायत तर्फे स्तुत्य उपक्रम राबवण्यात येत असून, लग्न सोहळ्याप्रसंगी वधूला घेण्यासाठी आलेल्या वरा कडून एक वृक्ष आणने व ते वृक्ष वधुच्या घरी लावने व ग्रामपंचायतच्या वतीने एक वृक्ष वधू-वरास देण्यात येऊन ते वृक्ष वराच्या घरी लावण्यात येत आहे. याचवेळी पंचांच्या साक्षीने वधु व वराच्या वयाची चौकशी करून जागेवरच विवाह नोंदणीचे प्रमाणपत्र देण्यात येत आहे.
या उपक्रमामुळे बालविवाह थांबण्यास मदत होत असून, शिवसेनेचे सरपंच विजय पाडवी व त्यांचे सर्व सहकाऱ्यांनी पुढाकार घेतला आहे. या उपक्रमाचे शिवसेनेचे संपर्कप्रमुख तथा माजी आमदार चंद्रकांत रघुवंशी,जिल्हा पोलीस अधीक्षक पी.आर पाटील, शिवसेना जिल्हाप्रमुख ॲड.राम रघुवंशी यांनी कौतुक केले आहे.
