नंदुरबार l प्रतिनिधी
अक्कलकुवा तालुक्यातील मोलगी पोलीस ठाणे हद्दीत सरी केलीपाडा येथे होणारा बालविवाह पथकाने रोखला आहे.ग़ेल्या चार दिवसात नंदुरबार पोलीसांनी पाच बालविवाह रोखले आहेत.
दि.१३ मे रोजी मोलगी व अक्कलकुवा पोलीस ठाण्याचे प्रभारी अधिकाऱ्यांना स्थानिक नागरिकांकडून मिळालेल्या माहितीनुसार मोलगी पोलीस ठाणे हद्दीतील सरी केलीपाडा गावात एका अल्पवयीन मुलीच्या विवाहाचे त्यांचे कुटुंबीय नियोजन करीत आहे व अक्कलकुवा तालुक्यातील निंबापाटी गावाचा राऊतपाडा येथील अल्पवयीन मुलींचा विवाह होणार असल्याची माहिती मिळाली. मिळालेल्या माहितीनुसार मोलगी पोलीस ठाण्याचे प्रभारी अधिकारी यांनी पोलीस ठाणे स्तरावरील अक्षता सेलच्या सदस्यांच्या मदतीने तात्काळ माहिती काढली असता,
मोलगी पोलीस ठाणे हद्दीतील सरी केलीपाडा गावात एका अल्पवयीन मुलीचा विवाह भगदरी ता.अक्कलकुवा येथील तरुणासोबत निश्चित करण्यात आला होता. परंतु मोलगी पोलीस ठाण्याचे सहा. पोलीस निरीक्षक अविनाश केदार यांनी अल्पवयीन मुलीच्या घरी जावून अल्पवयीन मुलीच्या कुटुंबीयांचे व गावातील नागरिक यांना कायदेशीर बाबी समजावून सांगून त्यांचे समुपदेशन करुन मनपरिवर्तन केले. तसेच अक्कलकुवा पोलीस ठाणे हद्दीतील निंबापाटी राऊतपाडा या गावात जावून अक्कलकुवा पोलीस ठाण्याचे प्रभारी अधिकारी राजेश गावीत यांनी माहिती घेतली असता तेथे अल्पवयीन मुलीचा वालंबा गावातील तरुणासोबत विवाह निश्चित करुन दि. 13 मे 2023 रोजीच विवाह होणार होता,
परंतु अक्कलकुवा पोलीस ठाण्याचे प्रभारी अधिकारी राजेश गावीत यांनी अल्पवयीन मुलीचे आई, वडील व तेथे हजर असलेल्या नातेवाईकांना तसेच गावकरी यांना बालविवाह केल्याने अल्पवयीन मुलीला होणारा त्रास तसेच बालविवाहामुळे होणारे दुष्परिणाम यांची व मुलीचा बालविवाह केल्यास पालकांवर होणारी कायदेशीर कारवाई याबाबत माहिती देवून त्यांचे समुपदेशन करुन मनपरिवर्तन केले. ऑपरेशन अक्षता अंतर्गत नंदुरबार पोलीसांनी चार दिवसात पाच बालविवाह रोखल्याने पोलीसांचे सर्वत्र कौतूक होत आहे. सदरची कामगिरी पोलीस अधीक्षक पी.आर.पाटील, अपर पोलीस अधीक्षक निलेश तांबे, अक्कलकुवा विभागाचे उप विभागीय पोलीस अधिकारी संभाजी सावंत यांच्या मार्गदर्शनाखाली करण्यात आली.
