नंदूरबार l प्रतिनिधी
नंदुरबार शहरातील मच्छी बाजार परिसरात काल सायंकाळच्या सुमारास धारदार शस्त्राने एका तरुणाचा खून केला. यामुळे परिसरात तणाव निर्माण झाला होता. पोलिसांनी जमावाला शांततेचे आवाहन करत परिस्थितीवर नियंत्रण मिळविले. दरम्यान, याप्रकरणी रात्री उशिरापर्यंत गुन्हा नोंद होण्याचे काम सुरु होते.
सुत्रांच्या माहितीनूसार, काल दि.3 जानेवारी रोजी सायंकाळच्या सुमारास नंदुरबार शहरातील मच्छी बाजार परिसरात अरबाज खाटीक याच्यावर धारदार शस्त्राने हल्ला करत संशयित जयेश गंगावने जीवेठार केले. बहिणीचा चार वर्षापूर्वी प्रेमविवाह केल्याची खदखद मनात ठेवून चाकू खुपसून खून केल्याचे सांगण्यात येत आहे. सदर घटना घडल्यानंतर परिसरात तणाव निर्माण झाला होता. घटनास्थळी संतप्त जमाव जमला होता. यामुळे परिस्थितीचे गांभीर्य लक्षात घेत पोलिस अधिक्षक पी.आर.पाटील, अपर पोलिस अधिक्षक निलेश तांबे, उपविभागीय पोलिस अधिकारी सचिन हिरे यांच्यासह पथकाने घटनास्थळी धाव घेत जमावाला शांततेचे आवाहन केले.
संशयित जयेश गंगावने यास पोलिसांनी ताब्यात घेतले होते. कायदा आणि सुव्यवस्था भंग करणाऱ्याची हयगय केली जाणार नाही, कोणीही अफवा पसरवू नयेत, शांतता राखावी, असे आवाहन पोलिस अधिक्षक पी.आर.पाटील यांनी केले. दरम्यान, घटनास्थळासह परिसरात कडक बंदोबस्त तैनात करण्यात आला होता. परिसरात तणावपूर्ण शांतता होती. कोणीही घटनेबाबत अफवा पसरवू नये, असे आवाहन पोलिसांतर्फे करण्यात आले. रात्री उशिरापर्यंत पोलिसात याप्रकरणी गुन्हा दाखल करण्याची प्रक्रिया सुरु होती.
