तळोदा । प्रतिनिधी
अंगणवाडी सेविका भरती प्रक्रियेतील वयाच्या अटीत शिथिलता मिळणे बाबतचे मागणीचे निवेदन एकलव्य आदिवासी युवा संघटनेच्या वतीने तळोदा गटविकास अधिकारी यांना निवेदन देण्यात आले.
या निवेदनात म्हटले आहे की, महाराष्ट्रातील महाविकास आघाडी सरकार तर्फे अंगणवाडी भरती प्रक्रिया राबविण्याबाबत सर्व जिल्हास्तरावर कळविण्यात आले आहे. त्या अनुषंगाने आपल्या नंदुरबार जिल्ह्यात अंगणवाडी सेविका भरती प्रक्रियेला सुरुवात झालीे असून नंदुरबार जिल्हा आदिवासी बहुल जिल्हा असल्याकारणाने अनेक इच्छुक पात्र महिला बेरोजगार असून नोकरीच्या शोधात फिरत आहेत. अंगणवाडी भरती प्रक्रियामध्ये अनेक महिलांना रोजगार मिळणार आहे. परंतु काही महिला भरती प्रक्रियेपासून वंचित आहेत. हा त्यांच्यावर अन्याय आहे. कारण तळोदा तालुक्यात साधारण मागील सन २०१७-१८ नंतर तब्बल चार वर्षा नंतर आत्ताच भरती प्रक्रिया सुरू झाली आहे. १०१७ – १८ नंतर लोकसभा, विधानसभा, ग्रामपंचायत, स्थानिक स्वराज्य संस्थांच्या निवडणुका अशा वेगवेगळ्या कारणांमुळे भरती प्रक्रिया रखडली होती. तसेच कोरोना सारख्या महाभयंकर महामारीमुळे भरती प्रक्रिया थांबली होती. यामुळे अनेक इच्छुक पात्र महिलांचे वय तब्बल चार वर्षानी वाढले आहे. त्यामुळे सदरील महिलांवर अन्याय होत असल्याने वयामध्ये शिथिलता देऊन त्यांना न्याय देण्याचा निर्णय घेण्यात यावा. अशा मागणीचे निवेदन एकलव्य आदिवासी युवा संघटनेच्या वतीने तळोदा गटविकास अधिकारी यांना देण्यात आले.
निवेदन देतेवेळी एकलव्य आदिवासी युवा संघटनेचे नंदुरबार जिल्हा प्रवक्ता गणपत पाडवी, मुकेश पाडवी, सुरेश पाडवी, दीपक वळवी आदी कार्यकर्ते उपस्थित होते.
