नंदुरबार l प्रतिनिधी-
शहादा पोलीस ठाणे हद्दीत मेंढ्या चोरणाऱ्या आंतरराष्ट्रीय टोळीला स्थानिक गुन्हे अन्वेषण शाखा तसेच शहादा पोलिसांनी जेरबंद केले. यात एकूण 3 गुन्हे उघड झाले असून 7 आरोपीसह एक विधीसंघर्षग्रस्त बालक ताब्यात घेत त्यांच्या ताब्यातून 10 लाख 10 हजारांचा मुद्देमाल हस्तगत केला आहे.
नंदुरबार जिल्हयातील शहादा पोलीस स्टेशन हद्यीत मेंढया चोरी करणाऱ्या आंतरराज्य टोळीविरुध्द स्थानिक गुन्हे शाखा व शहादा पोलीसांनी मोठी व यशस्वी कारवाई केली आहे. शहादा पोलीस स्टेशन गुन्हा रजिस्टर क्र.653/2025 भारतीय न्याय संहीता 2023 चे कलम-303(2) अन्वये दाखल गुन्हयांच्या तपासात ही कारवाई करण्यात आली आहे. शहादा तालुक्यातील शेतांमधून मेंढया चोरी झाल्याच्या तक्रारी प्राप्त झाल्यानंतर स्थानिक गुन्हे शाखा, नंदुरबार यांनी तांत्रिक व गोपनीय माहितीच्या आधारे तपास सुरु केला होता. तपासादरम्यान चोरीचा माल विकत घेणारा संशयित आरोपी मोहसिन ऊर्फ राजा हारुन खान (वय-32 रा. राजपूर जि.बडवाणी, मध्यप्रदेश) यास ताब्यात घेण्यात आले. त्याच्याकडून सखोल चौकशीत त्याने नमुद गुन्हयातील मेंढया या राजस्थान येथील चिंटु बंजारा, रावल बंजारा व त्यांचे साथीदारांच्या मदतीने शहादा परिसरातील विविध शेतांमधून मेंढया चोरी केल्याची कबुली दिली. सदर टोळी ही रात्री मेंढपाळांच्या वाडयांमधून मेंढया चोरी करुन त्या विक्री करत असल्याचे निष्पन्न झाले. तपासादरम्यान पोलीसांनी संशयित आरोपींकडुन एक राखाडी रंगाची इको कार (आर. जे. 20, यू बी. 5627), एक पांढऱ्या रंगाचा छोटा हत्ती , एक डिलक्स मोटारसायकल, मेंढया चोरीसाठी वापरलेली साधने तसेच मेंढया विक्रीतून मिळालेली रोख रक्कम सह एकुण दहा लाख दहा हजार रुपये किमतीचा मुद्देमाल जप्त करण्यात आला आहे. या कारवाईत चिंटू कालू बंजारा, रावल ऊर्फ राहुल कालू बंजारा, (विधीसंघर्षग्रस्त बालक), लक्ष्मण मदन बंजारा, धर्मराज बाबुलाल बंजारा, सोन जिया बंजारा, सर्व रा. कोन्ही, पो.डाबी ता. ताळेदा, जि. बुंदी, राज्य राजस्थान, अरबाज नुरमोहम्मद शेख, रा. हाटबर्डी, रापजुर, जि. बडवाणी, मध्यप्रदेश असे 7 आरोपीसह । विधी संघर्षग्रस्त बालकाचा समावेश आहे. सदर गुन्हयाचे तपासात मेंढी चोरीचे गुन्हे त्यामध्ये गु.र.नं. 653/2025, 668/2025 व 31/2026 असे एकुण 3 गुन्हे उघडकीस आणण्यात यश मिळाले आहे. सर्व आरोपींविरुध्द कायदेशीर कारवाई करण्यात आलेली असून पुढील तपास सुरु आहे.
सदरची कारवाई पोलीस अधीक्षक, नंदुरबार श्रवण दत्त. एस, अपर पोलीस अधीक्षक आशित कांबळे यांच्या मार्गदर्शनाखाली स्थानिक गुन्हे शाखेचे पोनि हेमंत पाटील, शहादा पोलीस ठाण्याचे पोनि हेमंतकुमार पाटील, पोसई विकास गुंजाळ, पोसई मुकेश पवार, पोहेकॉ मुकेश तावडे, विशाल नागरे, पुरुषोत्तम सोनार, मोहन ढमढेरे, ज्ञानेश्वर पाटील, पोना विकास कापुरे, अविनाश चव्हाण, पोशि शोएब शेख, भरत उगले, सतीष घुले यांच्या पथकाने केली आहे.
