नंदुरबार l प्रतिनिधी-
लोकांच्या अपेक्षांना न्याय देणारा विकास यापुढेही चालू राहील आणि त्या कामाच्या बळावर निश्चितच आमचा विजय होणार आहे असे असून सुद्धा काही विरोधक नडायचं काम करतात. विकासाला प्राधान्य देणाऱ्या आमच्या राजकारणात आमच्या विरोधकांनी अडथळा आणण्याचे प्रयत्न कितीही केले तरी त्याचे परिणाम होणार नाही. मित्र पक्षातील जे विरोधक साथ देत नाही, त्यांना त्याची किंमत याच्या आधी मोजावी लागल्याचं आपण पाहिलं. तरीही त्यांनी त्यांची भूमिका तशीच चालू ठेवली तर त्यांना पुढील वाटचाल कठीण होऊन बसेल; असा टोला भाजपाचे तथा महायुतीचे उमेदवार डॉ.विजयकुमार गावित यांनी लगावला.
नंदुरबार विधानसभा मतदारसंघातील भारतीय जनता पार्टीचे तथा अजितदादा राष्ट्रवादी काँग्रेस, शिवसेना शिंदे गट आणि रिपब्लिकन पार्टी ऑफ इंडिया आठवले गट या मित्र पक्षांच्या महायुतीचे उमेदवार डॉक्टर विजयकुमार गावित यांनी कालच 24 ऑक्टोबर 2024 रोजी उमेदवारी अर्ज दाखल केला. त्यानंतर लगेचच त्यांनी धानोरा भागातील सुंदरदे, करणखेडा, नारायणपुर, फुलसरे, उमर्दे बुद्रुक गावांमध्ये संपर्क दौरा केला. त्यानंतर आज दिनांक 25 ऑक्टोबर 2024 रोजी पातोंडा गटातील पातोंडा, वाघोदा, रकासवाडा, घुली, धमडाई, पथराई, करजकुपे, लोणखेडा, अडची, नळवे खु., नळवे बु या गावांमध्ये संपर्क दौरा केला. मतदारांशी संपर्क साधून म्हणणे जाणून घेतले. भारतीय जनता पार्टीचे तालुकाध्यक्ष जे एन पाटील, माजी जिल्हा परिषद सदस्य प्रकाश गावित, युवराज पाटील यांच्यासह प्रत्येक गावातील सरपंच सरपंच आणि महायुती मधील मित्र पक्षांचे पदाधिकारी कार्यकर्ते उपस्थित होते.
या दरम्यान झालेल्या भाषणांमधून त्यांनी सांगितले की, लोकांमध्ये गैरसमज पसरवण्याचा प्रयत्न लोकसभा निवडणुकीत झाला. दुर्दैवाने लोकांनी घाबरून त्यावेळेला चुकीचे मतदान केलं पण आता ते सावध झालेत. मी जो काही विकास करतोय त्याच्यावर लोकांचा विश्वास आहे. जवळजवळ 30 वर्षापासून सातत्याने जनता मला विश्वासाने निवडून देते आहे. या पुढच्या काळामध्ये मतदार फसणार नाही. काँग्रेसच्या भूलथापांना हसायचे नाही, ही भावना लोकांमध्ये निर्माण झालेली आहे.
त्यामुळे जे मागच्या काळामध्ये झालं ते होणार नाही आणि दुसरी गोष्ट मला सांगायची आहे की, आम्ही विकासावर मत मागत असल्यामुळे निश्चितपणाने कुठल्याही पक्षाचा कोणीही उमेदवार विरोधात उभा राहिला तरी विजय आमचाच होईल. आमच्या मित्र पक्षातील काही लोक विरोधात गेले. त्या विरोधकांना त्यांच्या चुकीची मोठी किंमत मोजावी लागली जर त्यांनी पुन्हा तसे केले तर त्यांचा पुढील काळ कठीण राहू शकतो, असे डॉक्टर विजयकुमार गावित म्हणाले. दरम्यान, विविध योजनांच्या माध्यमातून गाव विकासासाठी आणि वैयक्तिक लाभासाठी केलेल्या कामांचा उल्लेख देखील त्यांनी भाषणातून केला.
