नंदुरबार l प्रतिनिधी
छत्रपती शिवाजी महाराज यांच्या 350 व्या राज्यभिषेक वर्षानिमित्त छत्रपती शिवाजी महाराज यांच्या जीवनावर आधारीत “जाणता राजा” महानाट्याचे आयोजन 26 ते 28 फेब्रूवारी 2024 या कालावधीत जी.टी.पी. महाविद्यालयाचे मैदान, नंदुरबार येथे सायंकाळी 6 ते रात्री 10 या वेळेत करण्यात आले असल्याचे, जिल्हाधिकारी मनीषा खत्री यांनी एका शासकीय प्रसिद्धी पत्रकान्वये कळविले आहे.
छत्रपती शिवाजी महाराज यांच्या 350 व्या राज्यभिषेक वर्षानिमित्त छत्रपती शिवाजी महाराजांच्या कार्याची, नितीची, चारित्र्याची, विचारांची व कार्यकुशलतेची महती जनसामान्यांना विशेष करुन तरुण पिढीला मार्गदर्शक ठरावी, तसेच छत्रपती शिवाजी महाराज यांच्या गौरवशाली व अलौकीक वारशाला प्रसिद्धी मिळावी, तसेच त्यांचे विचार महानाट्याद्वारे जिल्ह्यातील जनमानसांपर्यंत पोहचावे यासाठी या महानाट्याचे आयोजन करण्यात आले आहे.
या महोत्सवात लोकप्रतिनिधी, स्वातंत्र्य सैनिक, शहिद जवानांच्या पत्नी व आई वडील, शासकीय अधिकारी-कर्मचारी, शालेय विद्यार्थी, मान्यवर व नागरिक यांनी उपस्थित रहावे या महानाट्यासाठी प्रवेश विनामुल्य असेल, असे आवाहनही जिल्हाधिकारी श्रीमती खत्री यांनी शासकीय प्रसिद्धी पत्रकान्वये केले आहे.
