शहादा l प्रतिनिधी
येथील पूज्य साने गुरुजी विद्या प्रसारक मंडळाच्या कला, विज्ञान व वाणिज्य महाविद्यालयाच्या एनसीसी विभागातील 49 कॅडेट्सनी जिल्हाधिकाऱ्यांच्या आवाहनानुसार दि.12ते24 मार्च या कालावधी दरम्यान आपदा मित्र प्रशिक्षणांतर्गत सहभाग घेतला.
नंदुरबार येथे आपदा मित्र हा प्रशिक्षण कार्यक्रम केंद्र सरकारच्या एनडीआरएफ कडून राबविला गेला. या प्रशिक्षण कार्यक्रमात सहभागी होण्यासाठी नंदुरबार जिल्हाधिकाऱ्यांनी आवाहन केले होते. त्यानुसार पूज्य साने गुरुजी विद्या प्रसारक मंडळाच्या कला, विज्ञान व वाणिज्य महाविद्यालयातील एनसीसी विभागाने सहभाग घेतला. 49 कॅडेट्सनी महाविद्यालयातील एनसीसी विभागाच्या वतीने नंदुरबार येथे पाठविण्यात आले होते. या प्रशिक्षण कार्यक्रमात आपत्तीचे प्रकार, आपत्ती व्यवस्थापन, पूर- महापूर या संदर्भात माहिती, आपदा पूर्वीचे व्यवस्थापन, त्यानंतरचे व्यवस्थापन, सीपीआर प्रात्यक्षिके, धोकादायक परिस्थितीमध्ये स्ट्रेचरवरून पेशंटला ने-आण करणे,नाईट ड्रिल, बोट बनविणे-चालविणे,
त्याची प्रात्यक्षिके, सर्पदंश, भूस्खलन व्यवस्थापन, आगीचे प्रकार व बचाव कार्य, यांची प्रात्यक्षिके, नैसर्गिक व मानवनिर्मित आपत्ती यांचे प्रशिक्षण देण्यात आले. या प्रशिक्षण कार्यक्रमासाठी कॅप्टन एस.एल.भालेराव यांनी कॅडेट्सना मार्गदर्शन केले.आपदा मित्र प्रशिक्षण कार्यक्रमात सहभागी होऊन भविष्यकाळात येणाऱ्या आपत्तीमध्ये प्रशासनास सहकार्य करण्यासह मानवी जीवन वाचवण्याचे महत् कार्य करावे असे आवाहन यावेळी करण्यात आले.प्रशिक्षणात सहभागी कॅडेट्सचे मंडळाचे अध्यक्ष दीपक पाटील, उपाध्यक्ष जगदीश पाटील, सचिव श्रीमती कमलताई पाटील, समन्वयक प्रा.मकरंद पाटील, प्राचार्य डॉ.आर.एस.पाटील यांनी अभिनंदन केले आहे.
