नंदुरबार l प्रतिनिधी
लोकसभा मतदार संघाच्या खा.डॉ.हीना विजयकुमार गावित यांना काल प्राईम पॉईंट फाऊंडेशनच्यावतीने नवी दिल्ली येथे हरियाणाचे राज्यपाल बंडारु दत्तात्रेय यांच्या हस्ते संसदरत्न पुरस्कार देवून सन्मानित करण्यात आले. खा.डॉ.हीना गावितांच्या नऊ वर्षाच्या कालावधीत त्यांच्या संसदेतील उत्कृष्ट कामगिरीबद्दल सलग सातव्यांदा त्यांना संसदरत्न पुरस्कार देवून गौरविण्यात आले आहे.
प्राईम पॉईंट फाऊंडेशनच्यावतीने सदर पुरस्काराचे वितरण सोहळ्याचे आयोजन दिल्ली येथे करण्यात आले होते.यावेळी हरियाणाचे राज्यपाल बंडारु दत्तात्रेय, संसदरत्न पुरस्कार ज्युरी समितीचे अध्यक्ष तथा केंद्रीय संसदीय कार्यमंत्री अर्जुनराम मेघवाल, खा.श्रीरंगअप्पा बारणे, के.श्रीनिवासन, ॲड.प्रियदर्शनी राहूल आदींच्या उपस्थितीत खा.डॉ.हीना गावित यांना सदर पुरस्काराने सन्मान्नित करण्यात आले.
खा.डॉ.हीना गावित या सन २०१४ मध्ये प्रथमच खासदार म्हणून निवडून आल्या होत्या. त्यानंतर त्यांचे कामकाज, संसदेत मतदार संघातील विविध प्रश्न मांडून ते सोडविण्यासाठी केलेला पाठपुरावा, मतदार संघातील विकासकामे, संघटन कौशल्य, प्रभावी वक्ता आदी गुणांच्या बळावर सातव्यांदा त्यांना दिल्ली येथे सन्मानित करण्यात आले.दरम्यान,सन २०१४ ते २०१९ या कालावधीत संसदेत केलेल्या भाषणांचे ई-पुस्तकाचे प्रकाशन देखील मान्यवरांच्या उपस्थितीत या सोहळ्यात करण्यात आले.
गेल्या दोन पंचवार्षिकपासून संसदेमध्ये नंदुरबार लोकसभा मतदार संघाचे प्रतिनिधीत्व करत आहे. नागरिकांच्या विश्वासामुळे मी मतदार संघातील विविध समस्या प्रभावीपणे सोडवू शकली आहे. राजकीय गुरु डॉ.विजयकुमार गावित, परिवाराचे पाठबळ व जनतेचा विश्वास या बळावर आणखी चांगली कामगिरी करण्याचा प्रयत्न करणार. आज सातव्यांदा संसदरत्न पुरस्कार देवून गौरव करण्यात आल्याने मी भावनिक झाली आहे.
– खा.डॉ.हीना गावित
(नंदुरबार लोकसभा मतदारसंघ)
