शहादा l प्रतिनिधी
शहरातील जुन्या वसंतराव नाईक विद्यालयाच्या प्रांगणात उभ्या केलेल्या प्रवासी वाहतूक करणाऱ्या व्हॅनला गुरुवारी दुपारी अचानक लागलेल्या आगीत कार पूर्णत: खाक झाल्याची घटना घडली. ही आग कशामुळे लागली हे स्पष्ट झाले नसले तरी वाहनातील शॉर्टसर्किटमुळे आग लागल्याचा प्राथमिक अंदाज वर्तविला जात आहे. सुदैवाने गाडीत प्रवासी नसल्याने मोठी दुर्घटना टळली.
एसटी महामंडळाचे चालक व वाहक हे विविध मागण्यांसाठी संपावर असल्याने काही ठराविक बसेस सुरू झाल्या आहेत. या बंदच्या काळात खासगी अवैध प्रवासी वाहतक करणाऱ्या वाहनांची चांगलीच चंगळ होत आहे. शहादा ते दोंडाईचा, नंदुरबार, शिरपूर दरम्यान मोठ्या प्रमाणावर अवैध प्रवासी वाहतूक सुरू आहे. शहरातील डोंगरगाव रस्त्यावरील जुनी वसंतराव नाईक माध्यमिक विद्यालयाच्या प्रांगणात कोणतीही परवानगी नसताना अवैध प्रवासी वाहतूक करणारी वाहने उभी राहतात.
गुरुवारी दुपारी शहादा-दोंडाईचा रस्त्यावर अवैध प्रवासी वाहतूक करणारी व्हॅन (एम.एच. ३९ जे- २४४९) उभी होती. या व्हॅनला अचानक आग लागली. बघता बघता पंधरा ते वीस मिनिटांत संपूर्ण व्हॅन जळून खाक झाली. सुदैवाने या गाडीत कोणीही प्रवासी नसल्याने मोठी दुर्घटना टळली. ही आग कशामुळे लागली हे स्पष्ट झाले नसले तरी वाहनातील शॉर्टसर्किटने आग लागली असल्याचा प्राथमिक अंदाज वर्तविण्यात येत आहे.
